|
華語版 台語漢羅版
本文目的主要在建立台語版的國家重要文獻語料，證明台語文的功能不只作為家庭語言而已，不管在法律攻防辯論場合、國家公務宣示部門都足堪大任，台語文做為台灣通行語的地位更加確認。
本文乃是根據南方快報所提供的華語版，透過「華台轉換系統」做初步對譯，然後對照臨場的台語文記錄，逐步人工校對為台語版。
南方快報提供的華語版雖儘量忠實，經過比對顯示，它還是以意譯為主，倘逕依該華文直接對譯台文，恐與原音有所出入。倘能取得原版發音的光碟，應該可修訂到更符合實際的口語版。
陳總統的發言並非全部台語，其間夾雜華語的部分，我視情況譯為台語，或是繼續保留華語詞。
親愛ê國人同胞，阿扁siōng敬thiàⁿ ê鄉親父老、兄姐、少年朋友，非常感謝大家tī百忙當中ē-tàng撥工聽阿扁仔「kā人民報告」。
大家應該iáu會記得，2年gōa前，就是2004年3月27日暗時仝款chit ê時chūn、chit ê所在，阿扁仔參加了一場國際記者會，當時tī總統府頭前凱達格蘭大道，有真chē人舉行抗爭，因為當年2004年3月20日總統大選後ê一禮拜左右，有一kóa候選人無法度接受台灣人民投票ê結果，講阿扁仔tī hit擺ê選舉作票，beh叫阿扁仔落台，相連續一禮拜霸佔凱達格蘭大道舉行抗爭。
彼當時阿扁仔透過國際記者會講出阿扁仔ê心情、想法kap期待，想bē到經過2年3個月，仝款ê所在，阿扁仔必須kā人民報告，不過情景tùi凱達格蘭大道sóa到立法院。  阿扁仔接tio̍h立法院hō͘咱ê咨文，叫咱tī 6月20日今á日chìn前，針對罷免案提出答辯書，當然對tio̍h立法委員，特別是最高民意機構－立法院，依照憲政秩序kap憲法增修條文有關規定所提出ê罷免案，咱必須kā伊尊重，但是真清楚ê，tī咨文中特別說明，如果無beh針對罷免案提答辯書，全院委員會猶是會使直接審查。
所以，今á日阿扁仔已經透過正式ê方式kā立法院王院長說明，本人決定無beh提答辯書，beh kā人民作報告，che完全是依照憲法kap增修條文、特別是立法院ê規定來進行，絕對無藐視國會ê意思，而且mā是依照憲政秩序來遵循。 當然，本人beh先說明ê是，今á日m̄是記者會，是kā人民報告，就算是記者會，大家lóng-mā知影，就親像2004年3月27日ê國際記者會，咱mā無hō͘記者朋友發問，真chē總統所參加ê記者會mā m̄是ta̍k pái lóng hō͘記者發問。因為今á日是kā人民報告，咱無希望失焦。我mā beh kā記者朋友特別聲明，咱未來ē-sái安排記者會，mā ē-tàng用透過茶敘ê方式kā各位記者朋友作報告，hō͘各位記者朋友ē-tàng提問，chit點iáu請各位記者朋友ē-tàng包涵。
立法院有人提案beh罷免總統，為啥物beh罷免總統？罷免理由是啥物？本人相信到目前為止，我敢講90 %、甚至有95 % ê台灣人民，恐驚iáu m̄知為啥物立法委員、有一kóa黨團beh罷免總統，罷免總統ê理由是啥物？大家敢知影？就算知影，敢講非常清楚罷免ê具體內容kap理由？ 阿扁仔相信親像chit款立法院ê咨文，內容所寫beh罷免總統ê理由，阿扁仔認為有必要kā大家作報告，chiah-ê理由敢tio̍h？事實敢是án-ne？chiah-ê理由敢無問題？是m̄是有真chē值得檢討ê所在？本人認為有必要kā人民作報告，hō͘大家知影，hō͘大家了解，hō͘大家mā ē-tàng來思考。
阿扁仔mā beh來拜託咱親愛ê國人同胞，阿扁仔siōng敬疼ê鄉親父老、兄姐、少年朋友，大家共同來公判，大家來講道理，阿扁仔無beh 更改罷免總統理由ê前後順序。
有關罷免第一點理由：「違憲亂政」
其中第一條beh罷免總統ê理由，講阿扁仔「違憲亂政」，講本人違反憲法「多數治理原則」而少數執政，講我「權力下放」形同公開承認過去超越憲法權限，敢是án-ne？大家lóng知影，阿扁擔任總統6年，本人任命行政院長組閣mā m̄是第1 pái，2000年阿扁仔擔任總統ê時，得票率為39.3％，連四成都無，tī國會咱泛綠所ē-tàng掌握ê席次無夠三分之一，彼當時，有誰講阿扁就ài用立法院ê多數黨來組閣？彼當時，阿扁仔直接任命國民黨唐飛先生來擔任行政院長，國民黨mā講伊無beh背書，mā無beh支持，彼當時有誰講本人是少數執政，抑是違憲亂政？
sòa落來，阿扁仔任命民進黨籍ê行政院長組閣，包括舊年謝長廷前院長，會記得伊去立法院作施政報告後， 無分朝野，無分黨派，全體立法委員lóng kā in呵咾，che是從來m̄ bat過ê現象。當然改革是當時的氣氛，扁宋會朝野和解、共生mā是真重要ê原因。敢有誰講這是違背憲法多數治理原則，是違法亂政？
所以呢！大家ài知影，大家lóng講bē-sái違憲，beh行憲。總統直接民選，總統任命行政院長無需要經過立法院同意，總統是國家安全會議主席，chiah-ê lóng是阿扁擔任總統前已經存在ê制度kap憲法修正過ê條文，m̄是阿扁仔所制定。無任何一條憲法條文規定總統著愛任命立法院ê多數黨組閣，做行政院長。這是憲法目前ê事實，大家如果認為án-ne無好，ē-sái修改憲法，ē-sái明文規定恢復行政院長ê任命必須經過立法院同意，看是beh來規定bē-sái少數執政，若按呢mā無要緊，無koh規定khah清楚咧，抑是規定tio̍h-ài經過立法院多數黨抑是多數聯名所推薦ê人做行政院長。若大家認為án-ne是對ê，是好ê，阿扁仔做總統自然照辦。但是 tī憲法未修改以前，我按呢做，有啥物m̄-tio̍h？
有關「權力下放」
有關「權力下放」，本人講kah非常清楚，屬tī總統ê，lóng總無改變，咱不過是將黨政ê運作「權力下放」，完全無違背憲法ê規定，tài ē-sái講我違憲亂政？
大家mā知影，國民黨執政時，以黨領政，任何重要人事kap政策lóng ài經過國民黨中常會通過後，chiah送到行政院院會討論，這是國民黨執政時ê模式。
 但是呢，到民進黨執政，咱bē-sái以黨領政，因為黨bē-sái比政iáu-khah大，黨不過是一個政治團體，按呢niâ-niâ。所以過去咱有九人小組，sòa落來總統兼主席以推行黨政同步，siōng chē是黨政相輔相成，因此過去ê習慣、經驗kap運作，人事也好，政策也好，中間有真chē無仝ê意見，就透過總統府派人或者是請總統親自出面來協調，che就是黨政同步ê運作模式。
咱感覺án-ne也有一kóa問題，因此希望大家chē少 ē-tàng分擔一kóa責任，5月31日阿扁仔講，除了總統職權無法度讓渡、無法度放棄外，其餘黨政權力徹底下放。也就是講，總統從此無koh出面，總統府mā無派員參與相關ê協調，這mā是好事一件，希望大家ē-tàng共同分擔責任。M̄-koh，用chiah-ê理由beh來罷免阿扁仔，講阿扁仔違法亂紀，按呢敢有理？án-ne敢tio̍h？我beh拜託鄉親父老兄弟姐妹來主持一個公道。
「五院」變成「四院」
其實，講tio̍h違憲亂政，咱知影咱是五權憲法ê國家，咱有五院，包括有監察院。M̄-koh我tī一年gōa前提名了監察院長、副院長kap監察委員ê人選，依照憲法，立法院應該採行同意權。當然，並m̄是我所提ê人，立法院lóng tio̍h-ai3照單全收、lóng tio̍h-ai3通過。你mā ē-sái無仝意、mā ē-sái剔除、mā ē-sái thâi掉，但是經過將近年半，無beh行使人事同意權，hō͘咱ê「五院」變做「四院」，致使咱無監察院，致使咱ê人權無保障，真chē陳情案無法度辦理、無法度查案、無法度糾彈不法，你講是啥人 teh違憲亂政？ chit-ê道理非常清楚！
講tio̍h違憲亂政，chit幾年來阿扁看tio̍h真chē資料，大家lóng知影司法ài獨立，但是過去有人bat講：「法院是國民黨開ê」，事實敢是án-ne？就以一個已經公開ê檔案文件來講，民國49年9月8日下晡5點，「自由中國」雷震案teh-beh宣判，當時是以軍法審判，tī宣判前ê 6點鐘，也就是當天上午11點，蔣介石總統tī總統府內主持了一個黨、政、軍ê內部協調會議，議題是針對下晡ê案件應該tio̍h按怎判。蔣介石總統親自裁示，白紙烏字寫講，刑期bē-sái低於 10年，「自由中國」一定ài關門，初審了後，上訴mā無用，無法度推翻初審決議。三點裁示白紙烏字寫落來，chit-má檔案文件已經公開，司法原本應該獨立，當時ê總統卻作按呢裁示，大家一定tio̍h照辦，後來mā是án-ne辦理。siáng敢挑戰、siáng敢講這是違法亂政？
大家lóng知影，總統身為國家領導人，mā是三軍統帥，只有總統三軍統帥chiah ē-tàng親自主持軍事會談。但是，大家是m̄是知影tī民國61年到67年間，是啥物人 teh主持軍事會談？61年到64年總統是蔣介石先生，sòa落來3年則是嚴家淦先生擔任總統，但tī這6年當中，軍事會談卻是由當時ê行政院院長蔣經國先生主持。我beh請問大家，行政院院長能力koh再強，伊m̄是總統，m̄是三軍統帥，憑啥物主持軍事會談？伊就án-ne主持6年軍事會談，你講，甚麼叫做違憲亂政？啥物人敢挑戰伊？啥物人敢講伊m̄-tio̍h？敢講ê人就會hông抓起來！但是chit-má ê情況敢ē-tàng hō͘你違憲亂政？咱必須ài嚴守分際，希望大家就此做一個參考。
有關罷免第二點理由：經濟不振
講beh罷免阿扁仔ê第二點理由是經濟不振，講阿扁仔拼政治，無顧經濟、罔顧民生，hō͘台灣經濟衰退，經濟表現在四小龍之末，國家競爭力mā tī全球排名下跌。阿扁仔 beh tī-chia向大家報告，咱beh來拼經濟，所以tī chia-pái立法院臨時會中，咱提出真chē治水法案kap預算，m̄-koh臨時會到現在召開chiah-ni̍h久矣，講beh kā治水法案排做第一案，講beh來通過，beh來討論，有無？真chē重要ê預算案lóng無討論、通過，只有政治考量，beh來罷免阿扁。是siáng拼政治無顧經濟，罔顧民生？
咱soa3落七月beh來召開「經續會」，m̄-koh有ê政黨已經表明無beh參加，既然講beh「拼經濟」，是按怎行政院beh來召開「經續會」又koh m̄支持？m̄參與？chiah-ê lóng是相當嚴肅ê課題，值得大家詳細思考。
我tī-chia提出三個統計數據請大家參考，當然，我對台灣ê經濟表現mā無滿意，mā希望台灣ê經濟ē-tàng koh-khah好。但是台灣ê經濟，敢講親像人講ê hiah-ni̍h bái？
第一點，今年5月咱ê進出口，無論是進口抑是出口lóng tī 180億美元以上，從來m̄-bat hiah kôan過，咱頂個月創造了歷史上ê高峰。
第二點是台灣ê外匯存底，tī 2000年阿扁上任時，台灣ê外匯存底是1000億美元，今年5月咱ê外匯存底已經超過2600億美元，其中1千3百億美元是來自外資，如果台灣ê經濟情況無好、投資環境無好，外資外商beh按怎會對台灣有信心咧？目前，咱ê外匯存底khiā世界第3，kan-ta輸中國kap日本。
第三點是咱ê平均國民年所得，舊年咱頭一pái超過1萬5千美元，今年咱有機會突破16,423美元，這lóng是歷史性ê新高。
根據IMD洛桑國際管理學院所做ê報告，咱ê全球國際競爭力，tī 2000年是第20名，舊年咱進步到第11名，siōng新ê數據咱退步做第18名，這是一個警訊，咱必須檢討問題到底出tī toh位？有人講，這kap政爭有關，無7-tio̍h，不過政爭絕對m̄是唯一ê因素，一定iáu有其他原因。
並m̄是所有ê國際競爭力評比lóng是kā 咱洩氣ê，mā有真chē ê鼓舞、真chē ê肯定kap期許。大家知影「世界經濟論壇」（WEF)有關「成長競爭力」ê評比，tī 2000年阿扁上任時咱是第10名，sòa落來逐年lóng有進步，分別是第7名、第6名、第5名、第4名、舊年退步1名成做第5名，m̄-koh咱是亞洲內底連續4冬ê第1名。
「世界經濟論壇」（WEF)有關「資訊科技競爭力」，真歡喜，咱第1 pái進入前10名，舊年咱是第15名，今年咱進步8名變做第7名，香港退步4名變做第11名，韓國是第14名，日本退步8名變做第16名，中國退步9名變做第50名。
英國經濟學人資訊中心（EIU)，針對全球經濟體ê經商環境進行評比，tī 2006到2010年，咱進步了3名，變做全球第19名。韓國為第26名，日本是28名，中國則是第50名。
阿扁仔提出chiah-ê數據，並m̄是beh自我安慰抑是推卸責任，咱猶原mā是bē滿意，因為只要咱koh-khah團結， khah少紛爭，台灣ê經濟絕對m̄是 án-ne niâ-niâ。
有人講，台灣ê自殺問題kap卡奴ê問題真嚴重，有關卡奴ê問題，大家知影咱已經teh改善中。其實，咱koh-khah嚴重mā無韓國嚴重。
咱ê自殺人口一年將近4千人，chit-ê數目是阮國十大死亡原因ê第9位；tī中國，自殺則是in十大死亡原因ê第5位，咱ê人口是2，300萬，中國人口有13億，以每年自殺人口4千人為基準推算，中國人口為咱ê 60倍，因此in ê自殺人數差不多是24萬人，m̄-koh根據阿扁所看tio̍h ê報告，中國1年自殺ê人數是29萬。簡單講，in ê問題比台灣koh-khah chē、koh-khah嚴重。大家lóng知影，生命是寶貴ê，任何人lóng無自殺ê權利，對tio̍h任何一個人ê不幸，咱lóng非常艱苦。但是，bē-sái「無限上綱」，講因為自殺ê人數chē，所以阿扁仔必須下台。
大家lóng知影，失業率咱已經有chiâⁿ大ê一個改善，2004年連戰主席競選總統時，bat講只要伊當選，beh將失業率降到4%，其實，最近ê六個月，咱ê失業率lóng保持tī 4％以下loh，4月是3.78％，雖然m̄是siōng好，m̄-koh有teh改善、有teh下降，咱希望講今年全國ê失業率ē-tàng降到4%以下，這m̄是無可能，m̄-koh beh用che做理由，以經濟無好，ài我下台、beh罷免我，按呢tio̍h m̄-tio̍h？我mā beh拜託咱 ê父老鄉親姐妹來評理、來公評。
有關罷免第三點理由：貪污腐敗、背棄清廉執政的承諾
第三點罷免理由講，阿扁貪污腐敗、背棄清廉執政ê承諾，第一家庭成做貪污ê死角，包括SOGO案、台開案、四大金控合併、OTC kap台灣高鐵案等，甚至第一夫人mā hông講兩年前對收取非法獻金ê指控，公開講白賊，kiáⁿ婿涉入股市內線交易、收取政治獻金、替人事關說。
Tī-chia，阿扁beh向大家做報告，無錯，清廉執政是siōng起碼ê自我要求、這mā是全民ê期待，做了無好，做了無夠，我lóng ài反省，執政團隊mā tio̍h檢討，m̄-koh你kā所有ê tāi-chì， lóng總kā伊當做弊案，每案必弊、無案不弊、無限上綱，按呢kám是事實？
Tī這，我beh kā大家講，像SOGO經營權之爭，我bat講過，我本人、我ê太太也好，絕對無介入經營權之爭，我也bat以新聞稿表示如果我ê太太有收受包括李恆隆、陳哲男、章民強、抑是徐旭東所贈送ê禮券，我願意下台一鞠躬，我ê保證、我ê承諾到taⁿ、到未來，lóng總絕對有效。m̄-koh我mā無希望看tio̍h有人每日一爆，甚到一日數爆，愈講愈花，我感覺按呢是足無道德，mā是足無好ê代誌。當然，阮太太bat去過SOGO買物，mā bat用過SOGO禮券，m̄-koh絕對bē-sái講這就是in四個所送ê禮券，kā兩個劃上等號，我感覺按呢m̄是無事實，現在檢調單位tng-teh調查，咱著愛尊重司法，咱mā bē-sái干涉，有抑無，相信最後檢調會kā國人同胞交待，m̄-koh無就是無，無直接the̍h過in四個人ê SOGO禮券，mā無干涉經營權之爭。
咱所關心ê是一個百貨公司尤其是SOGO，hiah-ni̍h有名，竟然發生問題，做為政府ê咱kan-ta關心銀行債權問題，私人百貨公司beh賣m̄賣？beh賣hō͘ siáng？是in ê tāi-chì，kap咱無關。m̄-koh有人giâ總統府高層ê名號，我感覺這是真無好ê tāi-chì，我聽tio̍h chih-ê風聲，我mā主動叫馬副秘書長去做一個澄清，總統也好、總統夫人也好，咱絕對無介入、也bē管，若以「總統」、「總統夫人」或者是「總統府高層」ê名義來招搖撞騙、唬人，我感覺lóng是無應該ê、mā是無道德ê事。Chit-má檢調單位tú-teh調查，希望司法單位ē-tàng調查清楚。
其次，有關「台開案」，阿扁chit-pái 9工8暝拚外交，tńg來到國內看tio̍h報紙chiah知影有「台開案」，所以，我也好，我ê太太也好，lóng kap「台開案」一點仔關係mā無，chit-ê tāi-chì tī猶未tī媒體發報進前，咱m̄知啥物是「台開案」，今á日不管是kiáⁿ婿抑是親家涉入「內線交易」抑是其他案件，一定ài接受調查，hō͘人收押，咱mā無話thang講，該起訴就起訴、該判刑就判刑，「法律chìn前，人人平等」，絕無例外，無護短，mā絕對無包庇。
Koh來講tio̍h「金控合併」的代誌，che是政府ê執政目標，咱beh tī 2年內，hō͘銀行ê逾放比降到5％以下，而資本適足率提升到8%以上，咱做到矣。第一階段ê金改成功，hō͘咱對第二階段ê金改koh-khah有期待，所以，舊年二次金改第一階段，咱ē-tàng kā官股銀行12間減半做6 家，mā有3家銀行市佔率達10％，咱感覺chiâⁿ安慰。所以，今年希望看金控kám-ē-tàng減半，當然這是高難度，因為真chē專業機構建議，台灣ê金控siuⁿ-chē間，in建議siōng好剩4間、5間抑是6間，m̄-koh咱認為siōng好減半做7家，m̄-koh絕對bē-sái財團化，mā tio̍h依照市場機制，大家ē-tàng有無仝意見，ē-tàng檢討、腳步mā ē-tàng放慢，m̄-koh chit-ê方向絕對是正確ê。
因為不管是新加坡、馬來西亞、或者是韓國，tī亞洲金融風暴了後，in針對銀行、金控ê整併，lóng有真好ê成績kap表現，咱台灣beh kap國際競爭，當然要思考銀行ê減併kap金控合併，m̄-koh咱絕無涉入所謂四大金控合併的代誌，ài按怎合併，咱行政部門相關部會有in ê斟酌kap考量，咱只有支持。
中間iáu-koh講tio̍h OTC案，我就看m̄-bat,可能是ETC,寫m̄-tio̍h矣，其實講tio̍h ETC,我mā感覺莫名其妙，我根本就m̄知啥物是ETC,我定定kā ETC kap計軸器lām作伙，kā chit-ê弊案kap hit-ê弊案sa bē清楚，mā m̄知ETC kap計軸器有啥物無仝，我iáu認為兩件是仝款ê，所以beh kā ETC牽涉tio̍h阿扁仔厝裡ê任何人身上，che mā m̄是事實。
台灣高鐵案是國家ê重大建設，tī阿扁2000年執政前，in就已經動工，tī我任內繼續興建，台灣高鐵當時有當時ê問題，我也m̄免講siuⁿ-chē，先天不良，m̄-koh tī後來，咱按怎協助伊，來完成全國siōng大ê BOT案，che m̄-nā是交通建設，mā是ē-tàng hō͘台灣成做一日生活圈，特別是「西部走廊」。所以對政府來講，咱只准成功，不准失敗，因此咱關心，不管是興建安全抑是財政，che是天經地義ê tāi-chì，任何院長lóng tio̍h鬥相共。
不只是高鐵，6月16日tú通車ê「北宜高速公路」，我mā是千拜託、萬拜託，iáu拜託當時ê游院長講，chit-má宜蘭人做院長，這條路koh bē-sái通車，án-ne就bē-tàng怪別人loh。大家想看māi，有真chē問題kám講m̄免私底下溝通？包括kap廠商ê問題，你beh人趕工，敢 m̄免補--人，所以有真chē問題就是án-ne關心chiah ē-tàng通車。為tio̍h安全，本來舊年年底、今年年初通車，延半冬，當時阿扁為tio̍h北宜高速公路列為六大建設，因為郝柏村院長無願意做，我tī擔任立委時 the̍h預算書kā郝院長 khian,對郝院長真歹勢，但是就是hit時ê衝動也好、抗議也好，m̄-chiah ē-tàng恢復北宜高速公路ê興建，chiah ē-tàng tī 6月16日正式通車，我mā感覺真歡喜。
基隆河ê整治、中科也好、中正國際機場也好、高雄水質ê改善也好，阿扁lóng非常盡心盡力，雖然我是總統，但是我對行政部門、相關部會ê要求真嚴格，chiah-ê是阿扁ê政見、阿扁ê承諾、也是國家ê重大建設絕對bē-sái講sńg笑，一定ài貫澈，一定ài完成。甚至大家知影ê土地增值稅béh年減半，經發會無過，he是多數意見，m̄是共識決，但是，阿扁知影土地增值稅二年減半非常重要，對房地產ê振興有幫助，對銀行體質改善koh-khah有幫助，就án-ne硬sak,真chē人批評án-ne是圖利財團、地主等等。
今á日看起來，chit件事我iáu是感覺真欣慰，咱做tio̍h矣。有人批評台肥人事，其實台肥人事kap南港軟體工業園區是兩回事，台肥人事beh按怎處理，董事長講總經理，總經理講董事長，大家講來講去，到尾， lóng總換掉，這mā是行政部門ê決定，咱也tio̍h尊重。
今á日ê重點是南港軟體工業園區第一期、第二期真成功，mā是咱ê 驕傲，所以需要koh再進一步有第三期、第四期，in mā kah意台肥ê土地，beh按怎取得，ē-tàng講，講會落大家儘量來合作，所以阿扁仔ê關心mā只有án-ne niâ-niâ，如果講bē落就soah去【算了】，kám講阿扁仔做總統，bē成ê代誌ē-tàng kā伊變kah會成？
所以kā chit-ê kap人事案牽拖作伙，實在是kā伊無限上綱，做無必要ê聯想，mā m̄免按呢。Koh 講tio̍h證實第一夫人對二年前收取非法獻金ê指控公然講白賊，我m̄是beh幫太太講話，事實就是事實，我ê太太並無講白賊，昨hng我koh kā問一pái，事實就是án-ne,無論是公ê場合抑是私ê場合，阮太太從來無kap陳由豪董事長見面，其實陳由豪是我台南縣ê同鄉，我做律師ê時chūnmā擔任過in公司ê顧問，mā辦過東雲公司ê案件，kap伊不只仔熟，所以我選市長，伊來贊助，我mā真感謝，我從來無否認the̍h過伊選舉ê錢，包括總統大選，伊hō͘國民黨一億，hō͘民進黨一千萬，咱mā真感謝，mā開收據，所以有就是有。
Kap伊根本無見過面，結果ē-tàng tùi 2003年、2004年講到今年2006年，iáu the花講我ê太太有kap伊見面，實在真無意義。我ê太太也bat承認過，陳由豪當時已經被通緝tī海外，沈富雄立委ê太太chhōa陳由豪ê太太到官邸欲見我ê太太，阮某mā是hō͘伊入來，已經是一個通緝犯ê太太，mā無 kā拒絕，有就是有，無就是無，用án-ne來作罷免ê理由之一，講夫人二年前對收取非法獻金公然講白賊，án-ne敢tio̍h？án-ne敢好？
有關罷免第四點理由：用人失當
第4條理由，講我用人失當，兩位副秘書長lóng身陷弊案，內閣中如杜正勝、龔照勝、林陵三、呂桔誠、張景森、侯勝茂等lóng hông看做國王人馬ê閣員，lóng是弊案纏身、爭議不斷。我beh kā大家報告，任何一個團隊，只要有人出問題、有爭議，lóng認為是弊案纏身，每一個人，你ē-sái kah意，mā ē-sái無kah意，無kah意ê人你就講是用人失當？陳哲男前副秘書長涉案收押偵辦中，咱就無加講，辦到底絕對bē寬貸。
馬永成前副秘書長兩pái到檢調單位，不過是證人，就講伊涉嫌犯罪而遭受tio̍h檢調約談，這mā kap實際有所出入。
杜正勝大家mā知影，伊是中央研究院院士，過去kap李登輝前總統非常好，伊是誰ê人馬，大家mā知影，伊ê台灣主體意識非常強烈，chit種ê話題，你ē-sái討論教育部長有適任無？但是bē-sái講有爭議，就講阿扁仔用人無妥當，但是伊絕對m̄是阿扁仔ê人馬。
龔照勝過去是外商，我mā無熟識，伊去任職其他職缺，mā m̄是阿扁仔ê意思，mā是人推薦後，講外商人才beh來投入政府行列，咱mā tio̍h表示歡迎kap重視，包括金管會主委mā是院長ê意思，阿扁kā in尊重並且幫忙說服，不過án-ne niâ-niâ。有問題接受調查，咱mā無護短，mā無任何包庇。
林陵三是因為過去台北市捷運局chhōe無局長，無人beh做，經過紹介，我mā無熟識， chhōe無人才，結果chhōe伊來當捷運局長，án-ne一年一條，五年五條捷運，也是tī伊任內推動成功，chit種ê人來做交通部次、部長，敢會失人ê禮？6月16日北宜高正式通車，林陵三敢lóng無功勞？咱bē-sái hiah-ni̍h現實，伊敢有啥物案件被列為被告，抑是被偵辦？
呂桔誠過去我mā無熟識，是我擔任總統後，伊tī國營會做副執行長、tī交通部所屬中華電信做副總經理時表現bē-bái， chiah注意tio̍h chit-ê人，後來伊擔任台銀董事長、今á日擔任財政部長，敢ē-tàng講伊是國王人馬？kā所有我任內用ê人lóng講做是總統人馬，按呢是按怎其他人m̄是neh?
張景森ê撇步【點子】一大堆，擔任台北市lóng發局長時，若無伊提出容積轉移ê【點子】，今á日不可能有信義計劃區ê開發；台北101大樓如果m̄是伊ê配合，我相信今á日mā無世界第一摩天大樓tī咱台北市，而伊tùi台北市都發局到經建會，hō͘人講東講西，但是我beh請問有叨一件有代誌，包括當時我tī台北市政府，監察院tī我beh競選連任時，chia也查，hia也查，chia也調查，hia也調查，有啥物人被調查，包括張景森。但是我mā是無著吊。
侯勝茂mā hông講是國王人馬，bē-sái講伊是趙建銘台大醫學院ê老師，án-ne就是國王人馬，其實伊beh擔任署長mā m̄是我ê意思，是當時院長ê推薦，當然侯勝茂我mā 熟識，所以支持，事實是án-ne.伊koh有啥物案件？有啥物爭議？
我舉出chiah-ê kā國家ê人才當做是個人人馬ê例，án-ne，官員是beh按怎做代誌？hō͘人分類，iáu hông分派系，這lóng是官場足無好ê文化，希望大家指教。
一個團隊中難免會有一kóa人出代誌，該按怎就按怎，咱mā絕對bē講國民黨時期劉松藩院長掏空銀行，現在teh跑路，所以就叫siáng tio̍h-ài負責、ài落台。過去國民黨地方議會議長鄭太吉殺人，一直判而未決，到底phah死人是phah幾槍，teh查是加一槍抑是減一槍，一直無法度判死刑確定，誰beh負責？伍澤元因為八里污水廠弊案，法院判決beh追繳16億以上，一個案件就beh hông追繳贓款超過16億以上，現在人tī 叨位？伊ê小弟iáu the做馬主席ê副秘書長，咱敢有去講過啥？
舊年縣市長選舉時，大家講國民黨提名ê候選人有一半以上有案底，包括最近台北市政府工務局官員集體貪污，有20 gōa人被起訴；tī地下室保險箱私藏烏槍；市政府陽台有人死去，半年以上無被發現，kui-ê管理hiah-ni̍h chē死角，咱敢有講什麼？所以我感覺，用人失當咱必須ài檢討、也必須ài接受公評，但是用án-ne講法，就beh kā總統罷免掉，敢有充分ê道理？
有關罷免第五點理由：外交挫敗
第五、外交挫敗，講阿扁仔tī公投議題上耍弄美國ê信任；tī終統議題上以文字操作hō͘美國對台灣失去耐心；tī過境議題上，以賭氣來耍弄美國，阿扁執政六年將台美累積40多年ê友好關係破壞殆盡，事實敢真正是án-ne?
大家lóng知影，公民投票是基本人權、普世價值，台灣人民無法度公投，這是咱家己漏氣、chiâⁿ無面子、無民主，按怎別人幾百年ê經驗，全世界lóng teh公投，按怎台灣ê公投變成洪水猛獸、災難、戰爭？阿扁替台灣人民爭取公投權利有啥物m̄-tio̍h？當然我mā面對真chē壓力，但是真清楚ê，最後敢有啥物tāi-chì？咱tī 2004年3月20日公民投票，最後敢有啥物tāi-chì？美國布希總統舊年11月tī京都講，「台灣ê民主是一個成功ê故事、是中國學習5榜樣」，咱敢有啥物無面子？講我推行公投，án-ne變成罷免我ê理由。
終統大家lóng知影，這是kap美國chhiâu好ê代誌，外交部黃部長前後己經講30幾pái矣，咱要廢統，in講mài用「廢除」chit種ê字眼， in建議用「凍結」抑是「中止」，後來咱建議用「終止」，終了ê終。英文ài按怎用？咱mā kā美國講，這是大家ê共識kap諒解，咱哪有用文字操作hō͘美國對台灣失去耐心？此pái薄瑞光理事主席來台，大家mā tī媒體上看kah真清楚，終統ê tāi-chì已經結束，伊mā真滿意阿扁總統對終統ê處理，咱將台灣ê未來、兩岸ê關係最後決定權交hō͘人民，m̄是任何政黨、任何國家ē-tàng替台灣人民決定，必須要尊重2300萬台灣人民自由意願ê選擇kap決定，這就是民主，是民主ê鞏固kap深化，án-ne敢有啥物m̄-tio̍h？
過境，這是為台灣國家ê尊嚴，這m̄是「食飽換iau」，坐飛機teh sńg，去巴拉圭tio̍h坐30幾個小時，按呢敢有快活？但是台灣國家ê尊嚴、身為總統咱必須有所堅持，總bē-sái kap 12年前李登輝前總統過境夏威夷時穿插拖鞋、睡衣來抗議。如果我去阿拉斯加tī飛機頂穿拖鞋、睡衣來抗議，án-ne敢有一個款？美國固然無面子，按呢咱iáu有什麼面子？所以我ē-sái mà過i境美國，照常ē-sái出去訪問，為外交chhōe出路、chhōe活路。Thang過境利比亞、印尼訪問，這lóng是咱所期待、所歡喜ê事，án-ne ê外交有啥物挫敗？過去6年，如果無美國支持，咱beh-ná ē-tàng tī 2003年1月1日成做世界貿易組織第144個會員國。
2001年9月，hit-chūn台灣做大水，tùi台灣頭淹到台灣尾，阿扁仔勘災用了1禮拜ê時間，日時勘災，暗時穿雨鞋到總統府頭前，雨鞋thǹg掉後，thǹg赤腳照常進總統府辦公，kap華府、日內瓦聯絡，為tio̍h啥物？為tio̍h台灣beh參加「世界貿易組織」（WTO)，美國kā咱鬥相共，beh按怎突破中國ê封鎖kap杯葛，我是用chit種ê心情「日時勘災，暗時拚外交、拚國際空間」，哪有啥物歇睏？這是美國鬥相共ê結果。
以「世界衛生組織」（WHO)、「世界衛生大會」（WHA)來講，阿扁tī 2004年連任了後，也就是公投了後，公投是3月ê tāi-chì，5月世界衛生大會開會，美國mā是第一pái投下贊成票，所以公投有什麼影響？美國仝款支持台灣參加「世界衛生大會」成做觀察員。咱為tio̍h beh參加「世界衛生組織」已經奮鬥十年矣，前八年thang講非常辛苦，m̄-koh後來thang講漸入佳境，m̄-nā美國、日本為咱投下贊成票，另外，有關「世界衛生組織」任何技術性ê國際會議，過去咱lóng無法度參加，chit-má已經ē-tàng參加至少14個以上，其他iáu teh爭取中。包括chit次「世界衛生大會」mā進一步hō͘咱ē-tàng有意義ê參與，這lóng是非常好ê tāi-chì，雖然bē-sái正式成做觀察員，m̄-koh作為一個觀察員ē-tàng擁有ê有意義參與，咱mā ē-tàng慢慢享受tio̍h，這當中美國對咱ê支持影響非常大。
「終統」也好、過境也好，大家講kah chiâⁿ歹聽，m̄-koh敢有影響tio̍h chit pái美國指派副貿易代表巴提亞來台灣，這是六年來美國官員來台層次siōng高ê，為tio̍h beh深化、強化台美兩國經貿關係，為tio̍h推動自由貿易協定（FTA)，希望建立台美緊密經濟【夥伴關係】。這mā是非常有意義、非常有價值ê tāi-chì。
台灣外交處境困難，m̄是tùi阿扁仔開始，所謂外交挫敗，1971年咱退出聯合國he敢m̄是挫敗？1978年台美斷交he敢m̄是外交挫敗？結果咱tio̍h「莊敬自強、處變不驚」，有誰講因為外交挫敗所以總統ài下台？誰敢敢講？
中國對台灣外交ê打壓是無分色彩ê，所以大家知影，過去我做市長時，iáu舉辦「國際地方政府聯合會」(IULA)ê「世界首都論壇會議」（WCF），當時包括美國華府ê首都市長mā來參加，時間是tī民國87年5月，阿扁iáu有能力辦chit-ê會議，m̄-koh當阿扁辦完「世界首都論壇會議」了後，中國知影了後開始抗議，講台北市哪有資格辦世界首都會議，台北m̄是首都，只不過是中國一個普通ê城市，首都是北京，所以kā台北市趕出來。
馬市長又koh按怎？台北市iáu是hông趕出「世界首都論壇會議」，中國對台灣ê打壓是無分色彩ê，無因為馬市長，台北市就無受tio̍h中國ê 打壓。今年4月tī台北市所舉行ê「亞洲主要城市網會議」mā是仝款，因為台北市beh主辦，結果中國北京抗議，講一個國家kan-na ē-tàng有一個城市舉辦，bē-sái有兩個城市，台北市beh辦、北京就m̄辦，所以舊年【開天窗】。有因為馬英九做市長，中國或者北京敢就有對台北市有所禮遇？無。
講tio̍h亞太經濟合作會議（APEC)非正式領袖高峰會，阿扁仔希望王金平院長ē-tàng代表台灣擔任總統ê特使，伊本人mā真歡喜有chit-ê機會，m̄-koh就算是王金平院長受tio̍h朝野chiah-ni̍h大ê愛戴kap擁護，bē-sái去就是bē-sái去。為啥物？因為chiah-ê牽涉tio̍h有國家主權象徵ê，包括國際會議，in ê 打壓、對台灣ê 打壓是無分色彩、無分藍綠ê。所以，咱ê外交處境是chiah-ni̍h困難，咱ài koh-khah團結chiah-tio̍h，結果kā chit種中國ê打壓，講做是咱外交ê挫敗，beh來罷免總統，án-ne敢有公平？
有關罷免第六點理由：兩岸關係緊張
第六條理由講，兩岸關係緊張。我beh請問大家，koh-khah按怎緊張，敢有過去hiah-ni̍h緊張？阿扁做總統六年，台海敢有發生啥物砲戰？敢有飛彈落到門口？蔣介石前總統ê時chūn iáu有金門砲戰，李登輝前總統時iáu有飛彈危機，phah到門口55公里外。阿扁ê時代六年，koh-khah按怎緊張mā無chit種tāi-chì發生，m̄是我真gâu，是大家共同ê努力，維持台海ê和平kap穩定。
如果講緊張，怎會有小三通到今á日ê擴大小三通？怎會有春節包機直航到今á日進一步ê四大包機專案？如果講今á日阿扁當總統是以意識形態處理兩岸關係，造成兩岸關係停頓，咱兩岸ê人員往來、兩岸ê經貿、對中國大陸ê經貿投資，lóng是歷史性ê新高，這敢是叫做停頓？
事實上，已經傷過頭熱矣、過度傾斜矣。結果用按呢講兩岸關係緊張，beh罷免總統？講我用意識形態處理兩岸關係，其實我有四個原則，當時宋主席舊年beh去中國ê時chūn，我mā kā這四個原則kā伊講，伊mā贊成，就是「主權」、「民主」、「和平」kap「對等」，這是我ê意識形態，mā是宋主席贊成ê四大原則，án-ne有啥物m̄-tio̍h？咱堅持這四大原則，bē-sái hông矮化、bē-sái hông邊緣化、bē-sái hông地方化、bē-sái hông去政府化、去主權化，這是作為一個台灣總統應該堅持ê原則，有啥物m̄-tio̍h？
講我「終統」悖離對「四不一無」ê承諾，6月8日我tī美國理事主席薄瑞光面前就講過，我2000年所講ê「四不」，只要中共無意對台動武，我ê「四不」無改變，我猶原重申強調我ê「四不」，美國mā表示歡迎矣！就是án-ne 矣！哪有什麼問題？án-ne要罷免我，講兩岸經貿政策退化到「積極管理，有效開放」，無敢beh大膽西進，按呢咱 lóng mài管理，hông hō͘ 伊過去，hông hō͘伊去，我敢 ē-tàng án-ne想？做總統、做政府敢 ē-tàng án-ne做？我有責任ê。美國國會ê調查報告講，全部去中國ê投資有5600億美金，其中一半2800億是tùi台灣來中國投資，如果真正有投資chiah-ni̍h-chē，是真嚴重ê tāi-chì。
有一工我看陸委會ê資料講，chit-má 1500億，佔全世界ê三成，tùi台灣來中國投資，chit-ê比例真高。咱tī接單、海外生產有40％，九成tī中國，chit種對中國ê高度倚賴、傾斜，如果咱失去台灣經濟ê主體性，咱變做in ê附庸、成做in經濟ê一部份，這是非常危險ê tāi-chì。講咱beh「積極管理，有效開放」，這m̄是二分法，卻是強調chit種風險管理，商業風險、政治風險，特別in對台灣iáu有敵意，目前iáu部署，有820枚ê飛彈瞄準台灣，每一年iáu以100枚到120枚飛彈繼續增加ê時chūn，咱敢ē-tàng無有所警覺，koh kā中國當作一般正常ê國家？
所以這是做為一個總統應該盡ê義務，咱bē-sái鎖國，mā bē-sái kā台灣所有ê經濟命脈kap資源全部鎖tī中國。阿扁chit種信念，絕對bē改變，我mā相信多數ê台灣人民應該ē-tàng體會阿扁對兩岸課題ê堅持。結果，有人soah講我「積極管理，有效開放」，hō͘兩岸關係緊張，所以要罷免總統。
有關罷免第七點理由：挑撥族群對立
Sòa落來第七條理由，講我挑撥族群對立，講阿扁仔kha̍p-bē-tio̍h就「愛台、賣台、本省、外省」製造族群對立，來爭取個人、一黨政治私利，撕裂族群和諧。講一句無輸贏ê，阿扁是所謂族群對立ê受害者，我若m̄是受害者，台北市長為啥物會連任失敗，我到taⁿ iáu輸kah莫名奇妙，是輸tī toh位？是我市長做了無好，iáu是有其他因素？
O̍at頭想看māi che也莫怪，國民黨ê領導者，當時就對催討不公不義ê黨產表明，講lín催討黨產就是teh挑撥族群對立。催討黨產kap族群對立有啥物關係？但是有ê人講，這就是族群對立，你mài koh再討，koh再討就是挑撥族群對立。
阿扁做台北市長chìn前，我有一條選舉歌，「台北新故鄉，先來慢到lóng相仝，新一代ê台北人。對台灣來講，台灣新故鄉，先來慢到lóng相仝，新一代ê台灣人」。七月初一，阿扁beh tńg來去故鄉祭祖，阮姓陳ê開基元祖，三百年前tùi中國詔安來到台灣，最近我mā聽tio̍h村裡ê人去詔安做尋根之旅，結果我發現過去報紙、媒體電視所報導ê，講阮ê祖先tī hia？故鄉tī hia？soah講了 m̄-tio̍h，認m̄-tio̍h祖先，認m̄-tio̍h祖先來ê所在。所以咱「不忘本」，咱ài知影tùi hia來，但是，iáu是會有真chē ê誤會，真chē報導ê錯誤。
今á日tī台灣，絕對無「省籍」ê問題，只有「國家認同」ê問題，我相信今á日有爭議ê，有歧見ê是，台灣主體意識kap大中國主義ê無仝。今á日有人beh聯共制台，有人beh反共保台，但是你bē-sái講hia-e5堅持台灣主體意識、堅持反共保台ê人，kap主張大中國主義、主張聯共制台ê人無仝，你無認同，你就講另外一旁m̄-tio̍h、阿扁仔m̄-tio̍h，所以beh罷免，如果án-ne就ē-tàng當作罷免ê理由， án-ne罷免bē了啦，反共保台以及台灣主體意識ê chiah-ê信仰者、主張者、堅持者，kám講lóng tio̍h被罷免，lóng tio̍h被趕出去？
台灣真小，咱應該tio̍h團結、ài和諧，咱應該tio̍h認同chit-ê所在，mài koh分彼此，咱ē-tàng尊重無仝ê意見、尊重無仝ê主張，但是bē-sái用chit種方式，來對待無仝意見ê人。
有關罷免第八點理由：操弄金融改革
第八條罷免ê理由，講是操弄金融改革，講政府以金改之名行圖利財團之實，講台新金the̍h-tio̍h彰銀經營權、台企銀民營化、中華開發收購金鼎證券案、元京集團kap復華金控合併案，lóng有第一家庭成員介入ê嫌疑。無就是無，你去問彰銀ê董事長張柏欣，第一家庭啥物人去介入台新金kap彰銀ê tāi-chì，lóng ē-tàng去探聽。
銀行beh民營化，這是政府ê政策，kap第一家庭有啥物關係？銀行無民營化，beh按怎會有競爭力。大家lóng講國營企業ài企業化、民營化，像中船、唐仔榮ê再生，因為án-ne今á日chiah ē-tàng生存落來。我會記得2000、2001年，中船就虧損76億，唐仔榮鋼鐵廠mā虧損80億，經過民營化、再生後，中船舊年thàn 9億，唐仔榮thàn 11億，ē-tàng轉虧為盈，本來是一個負擔，現在變成資產、變成驕傲，咱mā感覺真歡喜。
中華開發kap金鼎證券、元京證券，我根本就m̄知是siáⁿ，有啥物關係，講啥物有介入？仝款的，講tio̍h復華金，咱mā知影he是國民黨ê黨營事業，咱beh按怎去介入？chit種繪聲繪影ê事，chiah-ni̍h好牽拖？大家lóng知影金融改革，2000年阿扁做總統，下半年世界性ê經濟開始變歹，網路科技泡沫化，台灣首當其衝，我mā相當煩惱，大家lóng講tī 2000年底、2001年初，台灣有可能發生本土性ê金融風暴，我煩惱kah睏bē去，佳哉大家共同來努力渡過難關，koh tī 2001年訂為金融改革ê元年，今年臨時會通過6大金改法案。包括RTC、AMC ê訂定ē-tàng順利通過，iáu有經發會，beh按怎通過chiah-ê難關neh?
以前講，打消 phàⁿ-siàu【呆帳】超過6000多億，kám講he是阿扁時代所累積ê？變成phàⁿ-siàu koh ē-tàng 打消，無經過3、5年，敢是可能ê代誌？ lóng是teh擦尻川。大家過去mā bat聽過，kan-na是一個王玉雲ê中興銀行、劉松藩ê台中商業銀行、陳冠倫ê投資公司以及梁伯薰ê商業銀行、郭廷才ê東港信用合作社，因為掏空金融，kan-na chit五個就有jōa-chē？641億新台幣，你講，che kám講是阿扁仔ê時代所造成ê？lóng是替別人teh擦尻川。所以後來咱chiah推動258，後來咱成功矣，所以chiah推動二次金改，政府用心改革，soah kā伊污名化，kā伊醜化到講「無案不弊，每案必弊」，我感覺非常無公平，對咱所有ê工作伴非常的無公平。
有關罷免第九點理由：戕害新聞自由、媒體自由
第九條，beh kā我罷免ê理由講我戕害新聞自由、媒體自由，講我全力箝制媒體，打壓新聞自由，講我打壓TVBS，講我阻撓NCC。我若是戕害媒體自由，我今á日敢會chiah-ni̍h悽慘落魄？敢會hō͘人叮得chiah-ni̍h慘？
逐年5月3日是新聞自由日，美國ê自由之家，lóng會提出世界新聞自由度ê評比，咱台灣，2年前tī全世界190 gōa個國家內底排名第49名，咱mā是新聞自由國家，舊年進步5名，是第44名，今年咱進步9名，是35名。Tī全世界190 gōa個國家，有新聞自由ê國家，也有半新聞自由ê國家，也有完全無新聞自由ê國家，咱是排tī百分之百新聞自由ê國家ê行列，咱是kap歐美ê國家仝款，今年咱進步9名，是35名，台灣kap日本仝款，並列亞洲ê第一名。
阿扁若戕害媒體自由，咱敢ē-tàng kap日本仝款，新聞自由是亞洲ê第1名？中國第幾名？177名。Tùi後尾算來khah快，完全無新聞自由。所以咱iáu m̄知ài珍惜，iáu teh講我打壓新聞自由。
今á日就有人笑我，講阿扁你今á日知影矣hoⁿh！你m̄-tio̍h矣hoⁿh！當初時叫你kā TVBS關起來，你就bòai，chit-má你自食惡果，我真正mā無言以對，但是我ê信念，我無怨無悔，當時我就是因為「蓬萊島案」，我辦雜誌，去批評，所以咱ài爭取百分之百ê言論自由，後來我hông抓去關，所以阿扁仔就是當時無新聞自由，我是一個被害者，我是一個過來人，我非常珍惜，tùi威權行向民主，得來無容易，真chē ê民主，真chē ê自由，得來無容易，咱tio̍h-ài珍惜。我甘願過度民主、過度自由，mā無願意無夠，所以當時有人講beh關掉，我講，我bē-tàng án-ne做，我mā hō͘人罵kah chiâⁿ慘，in講，就是án-ne「軟土深掘」，án-ne一直弄落去，beh hō͘ 你死。
但是今á日市場機制感覺講，做kah傷過份矣，無應該是án-ne，自由閱聽者、讀者、聽眾、觀眾，大家會做一個監督、制衡kap處置，m̄免阿扁仔來無閒、來傷腦筋，這就是我對新聞自由ê尊重，但是尊重m̄是無限上綱，這是大家應該共同勉勵ê tāi-chì。若無，阿扁仔ē-tàng用過去ê國民黨政府戒嚴時期siōng捷用 ê一句話「破壞政府kap人民ê感情」，án-ne就kā人關起來矣，咱敢ē-tàng án-ne？為tio̍h國家ê安全，就beh kā人關起來，kā伊關掉。
大家知影，我若是án-ne做，慢慢á就會行入獨裁，獨裁就是án-ne產生ê。今á日ē-tàng用chit-ê理由，就ē-tàng用hit-ê理由，我敢ē-tàng án-ne做？我甘願家己受害，我mā無願意phāiⁿ戕害媒體ê罪，可能我m̄-tio̍h 矣，m̄-koh我無怨、我無悔。
講我kā NCC阻擋，m̄-koh NCC是阿扁掛牌ê，籌備處是阿扁掛牌ê，這是政府改造ê一部份，最後是拖siuⁿ久，無通過，但是假使有通過， tī過程中有牽涉是m̄是有違憲ê爭議，當然lah，就ài透過大法官來解釋，這是天經地義ê tāi-chì，beh ná ē-tàng講咱阻撓neh？所以chit-má有人開始煩惱矣，NCC變成BCC，變成藍色ê CC，所以大家ài非常嚴肅來面對chit-ê大家擔心ê課題。beh用án-ne kā我罷免，講我戕害媒體自由，敢有公道？
有關罷免第十點理由：施政毫無誠信
最後第十條，講我施政lóng無誠信，講我無論是tī核四案、iáu是兩岸政策，全部lóng人格誠信破產。
我beh請問，我敢有騙大家？核四議題，民進黨ê黨綱，規定kah真清楚，咱就是反核ê政黨、beh主張廢核ê政黨、行向非核家園ê政黨，阿扁做台北市市長，核四廠beh 抑boaih？tī一個市民過半數ê投票，贊成核四廠ài關掉，多數人贊成核四廠ài關掉，ài停建，he mā是我teh做市長，公開所做ê tāi-chì，mā是我ê政見，所以最後重新評估感覺講，核四廠應該tio̍h停建，所以做chit種ê宣布，在野黨beh kā我罷免，我mā認矣。
但是真清楚ê，後來經過大法官ê解釋，咱必須ài尊重國會ê決定，除非大家ē-tàng透過行政部門、立法部門協議，若無iáu是ài尊重國會ê決定。若是國會決定beh續建，咱tio̍h-ài尊重國會ê決定，尊重大法官ê解釋，咱無誠信破產。
今á日我ê理念、我ê信念，我iáu是反核，我iáu是主張廢核，要行向非核家園，我無改變過。
你講兩岸政策我有啥物改變， 咱無法度接受所謂一個中國原則，無法度接受九二共識，chiah-ê lóng是公開ê tāi-chì，我無騙大家，六年來我始終如一，未來ê兩年我iáu是bē改變，九二共識根本就無存在，一個中國就是beh將台灣變成中華人民共和國ê一部份，變成第二個香港，咱當然無法度接受。就是án-ne，因為我m̄接受一個中國，因為我m̄接受九二共識，就beh kā我罷免，án-ne敢有道理？
我bē-sái賣國求榮，我beh kap胡錦濤主席握手iáu m̄ khah簡單？我beh去北京iáu m̄ khah簡單？只要我接受一個中國原則，我就ē-sái去矣，我就ē-sái握手矣，但是he有啥物意義？che有啥物價值？我bē-sái做出hit種賣國求榮ê tāi-chì，這就是我ê堅持。如果講因為án-ne 就beh kā我罷免，我mā認矣！
講啥物我操弄「正名制憲」、撕毀中華民國，soah-koh突然主張大聲唱國歌，講我公開宣稱「台獨是自欺欺人，soah-koh發動廢統」，講我tio̍h，又koh講我m̄-tio̍h。我啥物時chūn bat講過「台獨是自欺欺人」？ mài kā我ê話斷章取義，kā我無講過ê tāi-chì變成罷免ê理由之一。當然，台灣是咱siōng好ê名字、siōng有力ê名字、siōng美麗ê名字，chit點我根本就無改變，對有正式外交關係ê國家，咱叫做中華民國（括弧台灣），現在聯合公報mā lóng是án-ne寫ê，若無，真正大家會sa bē清楚！
所以咱希望ē-tàng做一個思考，這敢有什麼m̄-tio̍h？咱需要一部合時、合su、合用ê台灣新憲法，che中間如果大家有無仝ê意見，lóng總ē-tàng討論，但是這是一個目標、一個理想，這敢有啥物m̄-tio̍h？當然我mā知影，beh改國號是gōa-ni̍h仔困難，但是有一kóa人有chit種ê主張，咱mā tio̍h kā伊尊重。iáu無改chìn前，咱就是中華民國，中華民國ê旗仔咱iáu是beh the̍h出去，阿扁仔去到toh位，mā lóng是the̍h中華民國ê國旗，唱中華民國ê國歌。
你講中華民國ê國歌有一kóa人m̄唱，唱kah無夠大聲，甚至bē-ài唱出來，這是為tio̍h啥物？這是非常重要ê嚴肅課題，為啥物別ê國家無chit種問題？為啥物咱台灣，咱家己ê國歌有chit種ê問題？敢有才調去中國大陸唱？敢有本事kā國旗the̍h到中國大陸去？
所以大家mài有雙重標準，阿扁ê原意，是beh凝聚咱kui-ê國家ê認同，鼓勵大家大聲唱咱ê國歌，這m̄是bē-sái改，但是tī無改chìn前，咱應該tio̍h大聲唱出咱家己國家ê國歌，án-ne有啥物m̄-tio̍h？soah講我lóng無誠信。
各位鄉親，各位父老兄姐，阿扁從政tú好25年，我行入政治這條路tú好四分之一世紀，這條路並無好行，人議員一任四年，我只有做三年一個月koh過三工，我就倒店矣。為tio̍h追求百分之百ê言論自由，為tio̍h蓬萊島案，我被判刑，m̄-nā被關，iáu害阮太太tī我選台南縣縣長謝票ê期間，遭受政治車禍，已經坐輪椅21年矣。作市長拚死拚活，拚kah第二年施政滿意度達到89％，拚到第4年落選mā iáu有76％，結果開票了後，我必須tio̍h講出「對進步團隊ê無情是偉大城市ê象徵」chit句話。
2000年阿扁tī大家無嫌棄，用愛、用民主ê選票來支持我，kap大家同齊來完成台灣歷史上第一pái政黨輪替，2000年5月20日上任後無kah半年，人就beh kā我罷免。
做一個里長mā ài經過一年，做一個總統soah無kah半年就beh kā我罷免，理由是因為公共政策ê意見無仝。咱beh停建核四，人beh續建核四，因為公共議題ê意見無仝款，就beh提出罷免，我看mā kan-na台灣chiah有pah！
2004年阿扁仔 beh連任競爭，非常激烈，投票前一工3月19日hō͘人暗殺，佳哉天佑台灣，大家有福氣，上天神明有保佑，hō͘我逃過一劫，soah iáu有人講我是自導自演，講我是作假ê，害這幾工連李昌鈺博士mā受tio̍h牽連、hông拖落水講伊the̍h錢了後teh作假，chit種ê侮辱方式敢著？阿扁敢會the̍h家己ê生命講sńg笑？輸贏無chē，但是mā m̄免chhōe理由，講是輸tī兩粒銃子面頂。
2004年3月20日開票以後，總統府頭前hit種ê景像，大家koh再想看māi，講什麼阿扁仔總統作票，beh 按怎作票？我bē曉，我mā無作票ê經驗，你講20萬選務人員，hiah-ni̍h chē人敢是我用ê？免講chē，20個、甚至2個就好，出來講是阿扁仔總統、是政府叫伊作票ê，有無？根本連半個mā無，án-ne講阿扁仔作票，koh m̄承認選舉ê結果，1600多萬張選票ài重新驗票，浪費二個月，雖然輸贏無chē，m̄-koh阿扁仔猶原是得tio̍h選舉，in敢有向全國人民道歉？講總統作票、講政府作票，造成hiah-ni̍h大ê風波，chiah-ni̍h-chē社會成本ê付出，敢有人出來道歉？
當然要拍選舉官司，這是當事者ê自由，兩件官司mā phah年gōa，最後官司lóng總輸了了矣，soah koh指控司法不公，到今á日beh來罷免我。M̄是阿扁仔驚罷免，阿扁仔尊重立法委員有罷免ê權利，阿扁仔ê去留交hō͘大家、交hō͘立法院、交hō͘ 2300萬ê台灣人民，阿扁仔上掛念ê，是大家hō͘我機會，á我是m̄是無hō͘大家滿意，koh hō͘大家失望，我koh-khah本土、koh-khah清廉、koh-khah改革，mā做了無夠chē、無夠好，我必須ài注意聽大家ê批評指教，我也必須ài隨時檢討家己、反省家己。真chē所在，可能我做m̄-tio̍h 矣；真chē所在，我必需ài向大家道歉；真chē所在我也必需ài接受各方面ê指責kap調查，但是有一點我必需ài kā大家講，因為大家hō͘我機會，四分之一世紀以來hō͘我chiah-ni̍h-chē ē-sái為大家服務ê機會，我必需ài珍惜得來無容易ê一切。
我無以為報，但是我非常清楚，細漢ê時chūn,父母kā我講咱兜散赤， m̄-koh散赤m̄是無面子ê代誌，散mā ài散了有志氣，所以我細漢ê時chūn去khioh蕃薯，m̄-k oh絕對bē-sái去偷提蕃薯。我beh讀冊，阮老父借錢來hō͘我讀，m̄-k oh 後來我thàn錢了後，一定ài 還，bē-sái欠人ê錢，chiah-ê是細漢ê時chūn阮老父母kā我講ê話。大漢了後，我擔任律師，定定hō͘當事人倒siàu，開支票付律師費定定bē-sái兌現，阮太太kā我講，你bē-sái án-ne，案件了錢也tio̍h辦，就算thap稅金mā tio̍h幫chiah-ê 可憐ê人，in會倒律師費，一定是有困難，一定ài好好仔替人做義務辯護。我從政ê過程，阮太太一再提醒我，做議員、首長有一個原則，bē-sái the̍h紅包、炒地皮，ài做正ê、清ê，所以我做總統以後自動減薪，因為做總統不是beh來領hiah-ni̍h高ê薪水ê，錢有夠用就好，一個月80幾萬，我自動減做40幾萬，四年一任減少2000萬，二任八年減4000萬，錢是身外之物，無啥物好計較 ê。
我會記得hit時chūn tī政權和平轉移ê時，相關方面ê人kā我講，總統有私奇錢，有奉天專案30億，以及當陽專案6億，私人mā ē-tàng開，我聽m̄-bat，後來咱知影，這根本是ē- sái得 ê。過去ē- sái，阿扁仔bē-sái。所以劉冠軍案發生tāi-chì，大家mā知影he是tī我就任前就發生ê tāi-chì，一khang hiah大khang，知影tih-beh突破矣，有關單位iáu kā我騙，講無事，錢無賠，文件mā無遺失，結果lóng m̄是án-ne,路尾我kā奉天案30億，當陽案6億lóng繳庫，咱是án-ne做ê。
查某囝大漢結婚了後，咱mā chiâⁿ擔心，增加新ê成員，所以對趙建銘，阮太太一再kā伊講，做醫生應該安分守己，兩種錢bē-sái the̍h，第一是患者ê紅包，第二是藥商ê錢。親家有緣，大家ē-tàng有親家門風，咱mā 足珍惜ê。但是，聽tio̍h chit種傳言時，咱mā chiâⁿ緊張，將親家叫來，一再kā伊講，你mài害我，chit-má時勢無仝矣，m̄是國民黨時代，chit-má是民進黨執政，人是用hàm鏡來看咱，「鴨蛋khah密mā有縫」， mài造成對我ê傷害，帶來我ê困擾，伊講bē，結果neh?所以hit工我kā阮太太講，kiáⁿ婿咱無才調教，chit-má就hō͘法律、司法來kā教，hō͘檢察官替咱來kā教示，當然無啥物thang比阿扁仔對kiáⁿ婿、親家牽涉chiah-ê案件，hō͘阿扁仔痛心kap難過，感覺真慚愧，但是我猶是ài負起這責任，我猶是願意接受任何指責，造成hiah-ni̍h chē、hiah-ni̍h大ê傷害，非常見笑，失禮。
總是最後，阿扁仔beh向大家報告，我知影chiâⁿ chē人chiâⁿ恨我，chiâⁿ chē人對我chiâⁿ bē爽，甚到有人感覺為啥物2004年3月19日hit銃無kā 我phah死，阿扁仔無hông phah倒，有一kóa人chiâⁿ m̄情願，所以最近有人講，銃子已經入好矣【子彈已經上膛】，只chhun猶未彈--出去【扣扳機】，beh hō͘ 阿扁仔死kah真pháiⁿ看。
大家lóng知影，兩年gōa前，阿扁仔無死，這條命是加出來ê，為tio̍h台灣，我願意付出代價，為tio̍h台灣，我也願意phāiⁿ十字架，為tio̍h台灣，我願意犧牲。如果真chē人對我ê怨、對我ê恨一定ài扣扳機，hō͘阿扁死kah 真pháiⁿ看，án-ne chiah ē-tàng平復、chiah ē-tàng紓解，án-ne我願意，我願意為台灣來犧牲，就請【扣扳機pah】！
但是我知影，大家iáu是崇尚和平ê，大家iáu是愛護自由ê，iáu是追求民主法治ê，咱愛台灣chit塊土地，咱希望台灣ē-tàng koh-khah好，我希望大家ē-tàng koh-khah團結。以暴制暴，訴諸暴力絕對bē-tàng解決問題，sòa落來我知影會jú來jú激烈，各種ê抗爭難免會有衝突，我iáu是beh再次呼籲大家必須ài冷靜，國有國法，咱有憲法秩序，mā有法律規定，咱希望大家ē-tàng理性來面對，我相信台灣人民絕對有夠額ê智慧kap能力來面對chit種ê困局，來共渡難關。
個人無重要，阿扁一個人mā無重要，阿扁上掛念ê是台灣2300萬人民bē-sái hông 欺負，咱台灣chit-ê偉大ê國度bē-sái成做人ê地方政府，bē-sái成做人ê特別行政區，台灣ê主體意識ê路線，台灣ê民主制度、自由制度、人權制度、和平制度，絕對是一條正確ê路，咱必需ài堅持勇敢行落去。咱ài相信台灣，咱ài相信人民，咱ài相信民主，koh-khah ài相信法治。
「蕃薯m̄驚落土爛，只求枝葉代代湠」，阿扁仔願意kap大家互相勉勵，為tio̍h台灣ê主體性，為tio̍h民主ê深化，為tio̍h兩岸ê和平，為tio̍h經濟ê繁榮，以及為tio̍h社會ê公義，咱必需要koh-khah團結。阿扁仔永遠追隨大家，追隨siōng偉大ê 2300萬人民，請大家ē-tàng繼續不吝提攜指教，阿扁敢有資格koh再繼續做咱ê總統，就交hō͘大家啦！就交hō͘ 2300萬ê台灣人民，大家來共同決定。足歹勢耽擱大家足多ê時間，mā影響大家足chē ê作息，再次kā各位致上最高ê敬意kap感謝，多謝，晚安！
| http://www.southnews.com.tw | 2006.06.20 |
|